Between Distances: An Unspoken Tale of Love – Part III (Final Chapter)

 

Between Distances: 

An Unspoken Tale of Love – (Final Chapter)

“Kuch mohabbatien, chahe khatam ho jaayein… kabhi khatam nahi hoti.”

Pichhle kuch dino se Vivaan ki neend udh chuki thi. Radhika ki yaadein usse sone nahi deti thi. Us raat jab lake ke paas usse ek chhoti si diary mili thi, us pal se uska dil bechain tha.

Us diary ke panne usse uski Radhika ke kareeb le ja rahe the, har lafz mein uski khamoshi ki cheekh thi.

Flashback Ends — New Life Begins

5 saal guzar chuke hain. Vivaan ne apni zindagi ko ek naye andaaz me jeena shuru kiya.

Ab wo ek chhoti si jagah pe rehta hai, jahan usne ek book café khola hai – “Yaadon Ki Chai.” Café ke ek kone mein “The Silent Bench” bhi hai – bilkul waise hi jaisa lake ke paas hota tha, jahan wo aur Radhika baarish me baithte the.

Vivaan har din naye logon ki kahani sunta hai – koi pehla pyaar batata hai, koi akhri. Kabhi kabhi wo un kahaniyon me Radhika ki jhalak dhoondhta hai.

Riya’s Journey Begins

Riya, Radhika ki chhoti behan, har jagah Vivaan ko dhoondh rahi thi. Radhika ke diary ke pichle panne par ek purana number likha tha – us number par call kiya, toh kisi ne kaha, "Shayad Vivaan kisi hill town mein café chala raha hai."

Riya ne ek ek sheher search kiya – cafes, libraries, poetry clubs... Har jagah Vivaan ka naam liya, lekin ya toh log pehchaan nahi paaye ya sirf muskurake reh gaye.

Ek din, jab wo chhoti si ladki ke saath café dhoondh rahi thi, ek kutta bhaagte bhaagte andar ghus gaya – ussi moment mein Vivaan ne us puppy ko godh me uthaya. Uske haath kaamp gaye.

Puppy ke peechhe aayi woh nanhi si ladki... aur uske baad... Riya.

The Final Letter

“Hello, aap Vivaan Sharma ho na?”

Vivaan ek pal ke liye ruka… uski aankhon me andhera sa chhane laga… phir dheere se bola, “Haan…?”

“Main Riya hoon… Radhika ki behen.”

Vivaan ka dil ek pal ke liye ruk gaya. Riya ne ek chhota sa khat uske haath me rakha:

Vivaan,

Agar tum ye padh rahe ho, to samajh lena... main laut kar nahi aa paayi. Main darr gayi thi, Vivaan. Tumse nahi, khud se. Par tumse door jaake samjha ki pyaar kabhi mukammal hone ke liye nahi hota – sirf mehsoos karne ke liye hota hai. Jab main wapas aayi, tum ja chuke the. Har jagah dhoonda tumhe, par mila sirf ek khali bench, ek khamoshi. Shayad meri kahani yahin tak thi. Tum apni kahani jeena... kisi naye lamhe ke saath, kisi naye naam ke saath.Aur haan... agar kabhi baarish ho aur tum us bench par ho, toh samajhna… main kahin paas hi hoon.

Tumhaari…
Radhika

Vivaan ne khat aankhon se lagaya, us chhoti ladki ki taraf dekha, jiske chehre pe Radhika ki muskan thi… aur Riya ki aankhon me jo pyaar tha, usme ek naya raasta tha.

Vivaan ne muskurate hue kaha:

“Ek chai ho jaaye?”

Aakhir Mein...

Vivaan ne Radhika ko kho diya… par pyaar ko nahi.
Wo har kahani me, har baarish me, aur har cup chai me zinda thi.

Aur kahani?

Kahani ab khatam nahi hoti… bas ek naye safar ki shuruaat hoti hai. 

फ़ासलों की स्याही से लिखी, एक अनछुई दास्तान, 

हर धड़कन में छुपी रही, उस बिछड़े दिल की पहचान।